Die Vryburger Diensorganisasie

Welkom by die Vryburgers... In 1652 land Jan van Riebeeck aan die Kaap om 'n halfwegstasie te stig vir die VOC se skepe. In 1657 kom die goewerneur tot die gevolgtrekking dat die taak om die land mak te maak so oorweldigend is dat hy dit nie alleen sal kan doen nie. Hy beveel aan dat ongeveer 550 van die VOC se kontrakwerkers van hul kontrakte onthef word en grond ontvang om vir hul eie rekening te bewerk. Die VOC keur dit goed en hierdie mense, bekend as die Vrije Burghers, word die eerste landbouers aan die Kaap. Vandag is daar nog steeds Vryburgers! Hulle is almal lede van ‘n Christelike Afrikaanse diensorganisasie wat geld insamel vir minder bevoorregtes. Deur ons 17 takke wat regoor die land versprei is maak ons die lewens van behoeftige mense ligter. Die Vryburgers voorsien daagliks kos aan honderde skoolkinders landswyd. Vir baie is dit die enigste kos wat hulle ontvang. ‘n Honger kind kan nie leer nie en ‘n ongeskoolde kind se toekoms is duister. Ongelukkig is daar steeds duisende kinders by wie ons nie uitkom nie as gevolg van ‘n gebrek aan fondse en mannekrag. Baie van hierdie kinders is ons land se toekomstige leiers. Die Vryburgers beskou dit as ‘n nasionale krisis en werk daaraan om hierdie tydbom te ontlont. Ons help hoofsaaklik in skole waar die staat nie help nie. Vryburgers is almal vrywilligers en ontvang geen vergoeding vir hul dienste nie. Al die geld wat ingesamel word, word direk aangewend in die doelmark. Die Vryburgers is soos een groot familie. Baie mense sluit by ons aan net om deel te wees van die kameraadskap en sosiale interaksie. Dit maak nie saak of u nou ‘n Prokureur, Ouditeur, Argitek, Mediese dokter, Sakeman of ‘n Boer is nie – almal is welkom en voel tuis by die Vryburgers Ons het ook ‘n “Facebook” teenwoordigheid waar ons lief en leed oor lede, korpse en projekte met mekaar deel. Kontak vir Henry Hall in Worcester om meer uit te vind hieroor Die Vryburgers bestaan reeds sedert 1963 en is geregistreer by die Departement Sosiale Ontwikkeling as ‘n organisasie sonder winsbejag. Vir meer besonderhede skakel : Gauteng: Fred Maree (079 078 5053) Noordelike area: Christo Malan (082 896 4100) Vrystaat: Gert Fourie (073 206 7676) Oos Kaap: Dries v. d Walt (082 871 4129) Wes Kaap: David McKinnon (082 374 8632) Matheus 25:40 ”Dit verseker Ek julle: Vir sover julle dit aan een van die geringstes onder julle gedoen het, het julle dit aan My gedoen” Kopiereg voorbehou 2006 Vryburger Diensorganisasie Vir navrae oor hierdie web kontak die webmeester